Thursday, July 10, 2014

အကူလက်ရုံး စက်ယန္တရားများ ၁



BMR-3
ယန္တရားတပ်များရဲ့ တိုက်ခိုက်ရေး ယာဉ်များဖြစ်ကြတဲ့ ပင်မတိုက်ပွဲဝင်တင့်ကားများ၊ အပေါ့စားတင့်ကားများ၊ သံချပ်ကာ တိုက်ခိုက်ရေးယာဉ်များ၊ သံချပ်ကာ လူသယ်ယာဉ်များ၊ အမြောက်ပစ်ကူပေးယာဉ်တွေ၊ ဒုံးတင်ယာဉ်တွေ၊ လေကြောင်းရန်ကာကွယ်ရေးယာဉ်တွေ၊ ရေဒါတွေ စတာတွေကို ရည်မှန်းချက်ကို ချီတိုက် တိုက်ခိုက်နိုင်အောင် အကူအညီပေးရတဲ့ စစ်ယာဉ်တွေ အကြောင်းကို ဖေါ်ပြပေးမှာဖြစ်ပါတယ်။ သည်ထဲမှာ တံတားခင်းယာဉ်တွေ၊ မြစ်ကူးယာဉ်တွေ၊ ရေဒါကာကွယ်ရေးတွေစနစ်တွေ၊ ပြင်ဆင်ဆယ်တင်ရေးယာဉ်တွေနဲ့ မှိုင်းရှင်းယာဉ်တွေပါဝင်ပါတယ်။ 

 တင့်ဖျက် မိုင်း အမျိုးအစားပေါင်းများစွာရှိပြီး မိုင်းတစ်လုံးဟာ တင့်ကားတစ်စင်းကို ကောင်းကောင်းဒုက္ခပေးနိုင်ပါတယ်။ ဒေါ်လာသန်းချီတန်တဲ့ တင့်နဲ့စစ်ယာဉ်တစ်စင်းစာ တန်ဖိုးဟာ မိုင်းကွင်း ၂ကွင်း ၃ကွင်းစာ ခင်းထားနိုင်ပါတယ်။ မိုင်း အမျိုးအစားပေါ်လိုက်လို့ အဆ၂၀၀ကနေ အဆ တစ်ထောင်လောက်ထိကွာတတ်တာမို့ မိုင်း အလုံးရာချီခင်းထားလို့ ရန်သူ့တင့်တစ်စင်း ထိခိုက်သွားရင် အရင်းကျေတယ်လို့ ဆိုနိုင်မှာပါ။ တန်ဖိုးနဲသလောက် အဖျက်စွမ်းအားနဲ့ ချိန်းခြောက်အားကောင်းလှတဲ့ တင့်ဖျက် မိုင်းတွေနဲ့ မိုင်းကွင်းတွေဟာ တင့်နဲ့သံချပ်ကာအပါအဝင် ယန္တရားတင်တပ်တွေအတွက် အဓိက အဟန့်အတားဖြစ်ပါတယ်။ ရန်သူ့ပစ်ကွင်းအောက် မဟုတ်တဲ့ ဆက်သွယ်ရေးလမ်းကြောင်းပေါ်က မိုင်းအတားအဆီးတွေ၊ ရန်သူခြုံခိုတိုက်ခိုက်ဖို့ ဒါမှမဟုတ် အခြားရည်ရွယ်ချက်ရှိရှိ တိုက်ခိုက်ဖို့ ထားတဲ့မိုင်းတွေ အပါအဝင် အခိုင်အမာ ခံစစ်မှာထားရှိတဲ့ ရန်သူ့ပစ်ကွင်းအောက်က မိုင်းကွင်းတွေကို ဖြတ်ကျော်နိုင်ဖို့ တင့်နဲ့ သံချပ်ကာတပ်တွေ အတွက် မိုင်းရှာ၊ မိုင်းရှင်းယာဉ်တွေ တွဲဖက် အသုံးပြုဖို့လိုအပ်ပါတယ်။ မြန်မာ့တပ်မတော်သုံး စစ်ယာဉ်တွေဟာ ရုရှားနဲ့ တရုတ်လုပ် သံချပ်ကာတွေ ဖြစ်လို့ ရုရှားလုပ် အဆိုပါ ယာဉ်တွေကို လက်လှမ်းမီသလောက် လေ့လာတင်ပြလိုက်ပါတယ်ခင်ဗျား။ 
DIM မိုင်းရှာစနစ်
မိုင်းတွေရဲ့ ပထမဦးဆုံးသော ခြိန်းခြောက်ထားနိုင်မှုဟာ မမြင်နိုင် မသိနိုင်တာဖြစ်ပါတယ်။ ဒါ့ကြောင့် ပုံစံ အမျိုးမျိုး၊ နေရာအမျိုးမျိုးမှာ ပုန်းကွယ်စောင့်နေမယ့် မိုင်းတွေကို ရှာဖို့ မှိုင်းရှာစက်တွေလိုပါတယ်။ မိုင်းရှာခွေးတွေ၊ လက်ကိုင်မိုင်းရှာစက်တွေနဲ့ ရအသေးစိတ် ပိုက်စိတ်တိုက်ရှာဖွေတာဟာ အသေချာဆုံးဖြစ်ပေမယ့် ချီတက်နေတဲ့ အဟုန်ကို အဓိက ထားရတဲ့ ယန္တရားတပ်ဖွဲ့တွေ အဖို့ အခြားမိုင်းရှာစနစ်လိုအပ်ပါတယ်။ ဒါ့ကြောင့် မိုင်းရှာစနစ်တွေကို ယန္တယားတွေနဲ့ တွဲဖက် အသုံးပြုလာပါတယ်။ ရှေ့ပြေးယာဉ်တွေ၊ ကင်းထောက်ယာဉ်တွေရှေ့မှာ အလွယ်တစ်ကူ တပ်ဆင်နိုင်တဲ့ မိုင်းရှာ စက်တွေရှိသလို၊ သီးသန့်ထုတ်လုပ်ထားတဲ့ မိုင်းရှာအထောက်ကူအပြု ယာဉ်တွေလဲရှိပါတယ်။
Husky DIM
 DIM လို့ အလွယ်တကူခေါ်ဆိုတဲ့ မိုင်းရှာစက်ဟာ တင့်ဖျက်တွေသာမက လူသတ်မိုင်းတွေကိုပါ ရှာဖွေပေးနိုင်တဲ့ ကိရိယာပါ။ သံချပ်ကာကားငယ်တွေ၊ စစ်သုံးယာဉ်တွေ၊ ဂျစ်ကားတွေရှေ့မှာ အလွယ်တကူတပ်ဆင်နိုင်ပြီး တစ်မီတာ အတွင်းက လူသတ်မိုင်းနဲ့ သာမန် တင့်ဖျက်မိုင်းတွေကို ရှာဖွေပေးနိုင်ပါတယ်။ လမ်းဘေးထောင် ဗုံးတွေနဲ့ လေဆာစနစ်သုံး တင့်တွေကိုတော့ ၂မီတာခွဲလောက်ကတည်းက ရှာပေးနိုင်ပါတယ်။ မီတာဝက် အတွင်းမှာတော့ မြေအောက် ၁၀လက်မကနေ တစ်ပေအတွင်း မြုပ်ထားမဲ့ လျပ်စစ်သံလိုက် မိုင်းတွေကို ထောက်လှမ်းနိုင်ပါတယ်။ ပြင်ဆင်ချိန် ၇မိနစ်သာလိုအပ်ပြီး များသောအားဖြင့် အပေါ့စား ယာဉ်ငယ်တွေနဲ့ တွဲဖက် အသုံးပြုပါတယ်။ တောက်လျောက် မိုင်းရှာပေးနိုင်ချိန် နာရီဝက်သာရှိတာမို့ အားနည်းချက်ရှိနေဆဲပါ။
 
IRM "Zhuk"
IRM "Zhuk" လို့ခေါ်တဲ့ မိုင်းရှာစနစ်ကတော့ မိုင်းရှာစနစ်သီးသန့်မဟုတ်ပါဘူး။ BMP-1 အပေါ်မှာအခြေခံထားတဲ့ ကုန်းရေ၂သွယ်သွား အင်္ဂျင်နီယာသုံး စစ်ယာဉ်ဖြစ်ပြီး တိုင်းတာမှု အမျိုးမျိုးနဲ့အတူ မိုင်းရှာခြင်းကိုပါ ဆောင်ရွက်နိုင်တာပါ။ ယာဉ်ရဲ့ရှေ့မှာ သာမန်မိုင်းရှာစက်ဖြစ်တဲ့ IMP-2 စနစ်ကို အလွယ်တကူတပ်ဆင်နိုင်သလို၊ RVM-2M တို့လို အဆင့်မြင့် ရေဒီယိုလှိုင်းသုံး စနစ်တွေနဲ့ မြစ်တွင်းနဲ့ သောင်စပ်တွေမှာ ထောင်ခြောက်ဆင်ထားတဲ့ ရန်သူ့မိုင်းတွေကို ရှာဖွေနိုင်မယ့် RshM2 မြစ်တွင်းမိုင်းရှာဖွေရေး စက်တွေကိုပဲ လိုသလို ပြောင်းလဲ တပ်ဆင်နိုင်ပါတယ်။ ဒါ့အပြင် တံတားခင်းတာ၊ မြေအပျော့အမာသုံးသပ်တာ၊ ရေအတိမ်အနက် ထောက်လှမ်းတာ အပါအဝင် အင်ဂျင်နီယာသုံး တိုင်းတာနည်းစနစ်များကို များစွာ အထောက်အကူပေးနိုင်ပါတယ်။
ပုံမှန်အားဖြင့် ဆိုရင်တော့ မိုင်းကို ရှာဖွေတွေ့ရှိတာနဲ့ မိုင်းရှင်းလင်းရေး အဖွဲ့တွေနဲ့ ရှင်းလင်းတာ၊ ဖေါက်ခွဲဖျက်ဆီးလိုက်တာ ချီတက်နိုင်ပါတယ်။ သို့သော်လည်း စနစ်တကျ မိုင်းကွင်း၊ ဒါမှမဟုတ် မိုင်းအမျိုးအစားတွေကို ရေနှောထားတဲ့ သတ်ကွင်းမိုင်းကွင်း၊ ဒါမှမဟုတ် အမြောက်၊ လေယာဉ် စတာတွေနဲ့ ကျဲချ ခင်းထားတဲ့ မိုင်းကွင်းတွေကို ချီစစ်အဟုန် မရပ်တန့်စေပဲ သို့မဟုတ် ကြာမြင့်ချိန် နဲနိုင်သမျှနဲနဲနဲ့ ကျော်ဖြတ်နိုင်ဖို့ မိုင်းရှင်းလင်းရေး  မိုင်းကွင်းဖျက်ဆီးရေး လက်နှက်တွေ လိုအပ်လာပါတယ်။ 
UR-3
UR-83 လို့ခေါ်တဲ့ မိုင်းကွင်းရှင်းလင်းရေး ရော့ကတ်စနစ်ဟာ အလေးချိန် ၁၈၀၀ကီလိုဂရမ် ယမ်းကြိုးကို မီတာ၁၂၀-၄၀၀ထိ ပစ်ခတ်ပြီး ဖေါက်ခွဲစေတဲ့ စနစ်ပါ။ အဲသည်စနစ်ကနေ အလျား မီတာ ၁၀၀ အကျယ် ၆မီတာ ရှိတဲ့ မိုင်းရှင်းပြီးသား လမ်းကို ရရှိစေမှာဖြစ်ပါတယ်။ သို့သော်လည်း ပြင်ဆင်ချိန် တစ်နာရီခွဲလောက်ထိ လူအင်အား ၅၀ကျော်လောက်က ပြင်ဆင်ကြရတာဖြစ်ပါတယ်။ UR83P(УР-83П); UZ3(УЗ-3);UZ3R(УЗ-3Р);ZRP2 (ЗРП-2) စသည်ဖြင့် မျိုးခွဲတွေရှိပါတယ်။
UR-77
အဲဒီစနစ်ကို ယာဉ်တင်အနေနဲ့ ပြုပြင်ထားတဲ့ စနစ်တွေကတော့ BMP-1 သံချပ်ကာယာဉ်ကို အသုံးပြုထားတဲ့ UR-77 နဲ့ UR-07 တို့ဖြစ်ပါတယ်။ UR-77 မှာ အဆင်သင့် ပြင်ပြီးသား ယမ်းကြိုးရော့ကတ် ၂ခုကို တစ်ပါတည်း သယ်ဆောင်နိုင်ပြီး PSM67 ဒါမှမဟုတ် PSM77 မိုင်းရှင်းစနစ်ကို သယ်ဆောင်နိုင်ပါတယ်။ မီတာ ၂၀၀ကနေ ၃၅၀ အကွာထိ ပစ်ခတ်နိုင်ပြီး အရှည် မီတာ ၉၀၊ အကျယ် ၆မီတာရှိတဲ့ မိုင်းရှင်းလမ်းကို ရရှိမှာဖြစ်ပါတယ်။ ပြင်ဆင်ချိန် ၃မိနစ်သာလိုအပ်ပြီး ပြန်လည်ဖြည့်တင်းဖို့ မိနစ်၃၀လောက် လိုအပ်ပါတယ်။ ယာဉ်အဖွဲ့သား ၃ဦးနဲ့ မိုင်းရှင်းလင်းရေး ဆောင်၇ွက်နိုင်ပါတယ်။
UR-07
 UR-07 ကတော့ ခေတ်မီ စနစ်တွေ တပ်ဆင်ထားတဲ့ BMP-3သံချပ်ကာ မျိုးကွဲတစ်ခုဖြစ်ပြီး ယာဉ်အဖွဲ့သား ၂ဦးတည်းနဲ့ ဆောင်ရွက်နိုင်ပါတယ်။ PSM06 စနစ်သုံး မိုင်းရှင်းစနစ်ဟာ မီတာ ၃၄၀အရှည် ရှိတဲ့ မိုင်းရှင်းလမ်းကို ရရှိနိုင်ပါတယ်။ PSM07 ကတော့ မီတာ ၇၀၀ကနေ ၁၀၀၀ထိ ရရှိစေနိုင်တယ်လို့ ဆိုပါတယ်။ ၂၀၀၉ခုနှစ်မှ စတင်ထုတ်လုပ်ထားတဲ့ အဆင့်မြင့် စနစ်တစ်မျိုးလဲ ဖြစ်ပါတယ်။ သည် မိုင်း၇ှင်းလမ်း ရပြီဆိုတာနဲ့ အင်ဂျင်နီယာသုံး(armored engineer tractor) တွေ ဘူဒိုဇာတပ်ထားတဲ့ သံချပ်ကာယာဉ်တွေ ဦးဆောင်ပြီး မိုင်းရှင်းလမ်းကနေ ဖြတ်သန်းနိုင်ကြပါတယ်။
engineer tractor
ရန်သူ့တိုက်ရိုက်ပစ်ကင်းလွတ်ရာ ဒါမှမဟုတ် ရန်သူကို ပစ်အားနဲ့ ဖိနိပ်ထားနိုင်တဲ့ ကြိုတင်ပြင်ဆင်ထားတဲ့ စစ်ဆင်ရေးတွေမှာ အသုံးပြုကြတဲ့ အထက်ပါ မိုင်းရှင်းစနစ်တွေဟာ မိုင်းကွင်းနေရာ အတိအကျသိထားမှသာ အဆင်ပြေမှာဖြစ်ပြီး ရန်သူ့ကို အရှိန်အဟုန်နဲ့ အလစ်အငိုက်စစ်ဆင်ဖို့ အတွက်ကိုတော့ မလွယ်ကူလှပါဘူး။ ဒါ့ကြောင့် သံချပ်ကာ တိုက်ယာဉ်တွေရဲ့ ရှေ့ကနေ ဖြုတ်နိုင်တပ်နိုင်တဲ့ မိုင်းရှင်းစက်တွေကို တပ်ဆင်ကာ စစ်ဆင်နိုင်သလို၊ မိုင်းရှင်းဖေါက်ခွဲရေး ယာဉ်တွေ အကူအညီနဲ့လဲ စစ်ဆင်နိုင်ပါသေးတယ်။ 
KMT-7 on T-72
KTM-6, KTM-7, KTM-8 စတဲ့ တင့်ကားရှေ့မှာ အလွယ်တကူ ဖြုတ်နိုင်တပ်နိုင်တဲ့ မှိုင်းရှင်း ဒလိမ့်တွေကို အသုံးပြုကြပါတယ်။ KTM -6ဟာ ကနဦး ထွက်ရှိတဲ့စနစ်ဖြစ်ပြီး KTM-7 ကတော့ အသုံးအများဆုံးဖြစ်ပါတယ်။ KTM-8 ကတော့ ထူးခြားတဲ့ မြေမျက်နှာပြင်နဲ့ မြေသားထုကိုလိုက်ပြီး စူးတွေ ကော်တွေ တပ်ဆင်နိုင်တဲ့စနစ်ဖြစ်ပါတယ်။ TMS-S ကတော့ မြေပြင်ကို အပြည့်ဘီးလှိမ့်တဲ့စနစ်ဖြစ်ပြီး အသုံးပြုမှုနဲပါးတဲ့ ဖွံဖြိုးဆဲ စနစ်တစ်ခုဖြစ်ပါတယ်။ မှိုင်းရှင်း ဒလိမ့်တွေဟာ T-55, T-62 လိုတင့်ကားတွေကနေစလို့ T-72, T90လို တင့်ကားတွေ၊ BMP-1, BMP-3 စတဲ့အပေါ့စားယာဉ်တွေနဲ့ပါ တွဲဖက် အသုံးပြုနိုင်ပါတယ်။ သည်ဒလိမ့်တွေဟာ ဒလိမ့်တွေချည်း သက်သက်တော့မဟုတ်ပါဘူး။ တင့်ကားရဲ့ရှေ့ တစ်မီတာလောက်ကနေ တင့်ကားရဲ့ တုန်ခါမှုနဲ့ တင့်ကားဆီကနဲ့အလားတူစွာ ရေဒီယိုသံလိုက်လှိုင်းတွေ ထုတ်ပေးတဲ့သည်စနစ်ဟာ ဒလိမ့်တုံးတွေ မိုင်းပေါ်မရောက်ခင် မီတာဝက်လောက်မှာ ပေါက်ကွဲစေတာပါ။ လေဆာရောင်ခြည်သုံး နဲ့အဝေးထိမ်း မိုင်းတွေ မပါဝင်တဲ့ မိုင်းကွင်းတွေကို အရှိန်အဟုန်နဲ့ ဖြတ်ကျော်ရာမှာ အင်မတန် အသုံးဝင်တဲ့ စနစ်တွေဖြစ်ပါတယ်။ တင့်ယာဉ်ရဲ့ ဘေးတစ်ဘက် ၃မီတာလောက်ထိ ထိရောက်တာမို့ ယာဉ်ဖြတ်သွားလာရာမှာ အကျယ် ၁၂မီတာခန့် မှိုင်းရှင်းလမ်းကို ရရှိစေမှာဖြစ်ပြီး ရန်သူ့ပစ်အားအောက်ကနေ တိုက်ရိုက်ဖေါက်ဝင်နိုင်မယ့် စနစ်လဲဖြစ်ပါတယ်။ သို့သော်လည်း မိုင်းအလုံးရေ ဆယ်ဂဏန်းထက် ပိုလာခဲ့ရင်တော့ စနစ်ကို လဲပေးဖို့ လိုအပ်ပြီး အချိန် နာရီဝက်လောက်သာ လိုမှာဖြစ်ပါတယ်။
BMR-3M with TMS
အဆိုပါစနစ်ကို ယာဉ်အနေနဲ့ သီးသန့်ထုတ်လုပ်တာကတော့ BMR-3 (T-72) နဲ့ BMR-3M (T-90) တို့ဖြစ်ပါတယ်။ T-62, T-55 နဲ့ BMP တွေမှာလဲ ၎င်းစနစ်သုံး ယာဉ်အမျိုးအစားတွေ ရှိကြပါတယ်။ သို့သော်လည်း ခေတ်မီလာတဲ့ မိုင်းခင်းစနစ်တွေနဲ့ အဝေးထိမ်းစနစ်တွေ ထွန်းကားလာတဲ့ အတွက် မိုင်းကွင်းနဲ့ မိုင်းအတားအဆီးတွေကို ဖြတ်ကျော်ရာမှာ မိုင်းကိုသာ အဓိကထားမနေတော့ပဲ ရေဒီယိုလှိုင်းနုန်းတွေ၊ အဆင့်မြင့် တုန်ခါနုန်းထုတ်လွှင့်စက်တွေ သုံးပြီး မိုင်းတွေကို တပြိုင်တည်းရှင်းလင်းနိုင်ဖို့ မိုင်းရဲ့ စနက်တံမှာ တပ်ဆင်ထားတဲ့ တုန်ခါနုန်းတိုင်းတာစနစ်၊ လျပ်စစ်သံလိုက်စနစ်၊ ရေဒီယိုလှိုင်းစနစ်စတာတွေကို ဖိဖျက်နိုင်ဖို့ Jamming စနစ်တွေကိုပါ စမ်းသပ်လျက်ရှိနေကြပါတယ်။ ကျန်းမာချမ်းသာကြပါစေ။

5 comments:

  1. ဖတ်ရတာ ဗဟုသုတ တိုးသဗျာ........။ တစ်ခု လောက်မေးပါရစေ...။ တင့် ဖျက်မိုင်း တွေက သာ မန် လူ အလေး ချိန်လောက်ဆို ပေါက်နိုင်သလား ဗျ...။ လူ နင်းရုံ နဲ့ ပေါက်လောက်သလား..... ။ ဖြေပေးပါဦး ဆရာ မောင်ဟန်...

    ReplyDelete
    Replies
    1. တင့်ဖျက်မိုင်းတွေဟာ လူတက်ခုန်ရင်တောင် မပေါက်ဘူးလို့ ဆိုကြပါတယ်။ (ခုန်တော့မကြည့်ပါနဲ့) တင့်ဖျက်မိုင်းကို တင့်အလေးချိန်နဲ့ပဲ စနက်တံ ထားတာ ရှားသွားပါပြီ၊ တုန်ခါမှု၊ သံလိုက်လှိုင်း၊ လေဆာရောင်ခြည် စတာတွေနဲ့ စနက်တံထားတာ ပိုများပါတယ်။ ကျနော် သိပ်မကျွမ်းကျင်တဲ့ အရာမို့ အမှားပါရင်လဲ ပြင်ပေးကြပါခင်ဗျာ။

      Delete
    2. ရှင်း ပြပေးလို့ ကျေး ဇူး တင်ပါတယ်.... ဗျာ..။ အားပေးလျက်ပါ...။

      Delete
  2. အားပေးလျက်ပါ

    ReplyDelete